I se tasi o tusitusiga a le nusipepa o le Savali I le lomiga o le vaiaso ua tauana’i atu, o lo o fa’ailoa mai ai se gaioiga fa’asolitulafono na alia’e mai i se ‘auso sa palota fa’afoliga le tasi o i la’ua ia, e ui e le’i resitala o se ‘ tagata palota lesitalaina mo Vaimauga #3’, ile taimi o le faigapalota la’ititi a le itumalo o Vaimauga 3 ile amataga o le tausaga nei.
Aso Lua 29 Aukuso 2023
I le fa’atinoina o lenei gaioiga fa’asolitulafono, o lo o fa’ailoa mai ile faatalanoaga a le Sāvali ma le Komesina o Faigapalota le afioga iā Tuiafelolo Alexander John Stanley, le a’afia ai ‘ o se ‘auso na mua’i palota fa’afoliga le tasi o lea ‘auso o lo’o lesitala i le Itumālō Palota o Vaimauga #4, peita’i na taofia ai lona uso sa lesitala sa’o i le Itumālō Palota o Vaimauga #3 ina ua aga’i ane e faia lana palota ma maua ai ua mae’a faia lana palota e se isi tagata e fa’aāoga ai le igoa o lea tagata ’.
VOTE COUNT APP
O le atoaga o le tusitusiga lenei o lo o faailoa mai ai, ‘ o le Polokalame Fa’apitoa (App) e igoa o le Vote Count App a le O.E.C. sa mafai ona maua lelei ai le ua molia nei, ma o se faiga taufa’asesē ua fa’ailoa manino e Tuiafelolo, e lē taliaina i le Tulafono o Faigā Palota 2019. Ua mae’a folasia lea matā’upu i le Fa’amasinoga ma o lo’o tālia le lauina o lona fa’asalaga.
$100 LE SALA O LE LĒ PALOTA | $2000 LE SALA O LE LĒ RESITALA
Mo le silafia, ua fa’ailoa manino e Tuiafelolo, o le Vaega 13 o le Tulafono o Faigā Palota 2019 o lo’o fa’amalosia ai le tatau ona lesitala so’o se tagatānu’u Samoa ua atoa lona 19 tausaga ma luga atu, afai ae lē lesitala mo le Palota a Samoa, o le fa’asalaga e $2,000.
A’o le Vaega 63 o lea lava Tulafono, o lo’o fa’amalosia ai le palota o tagata Samoa ua 19 tausaga ma luga atu, ina ua mae’a lesitala, afai ae lē palota ae ua uma ona lesitala, o le fa’asalaga e $100.
Saunoa Tuiafelolo, e āoga matā’upu ua alia’e mai i lenei vaitau, e fa’amanatu ai pea iā Samoa aoao, le tāua o le palota, ina ia fai ma o tatou sao auā le filifilia o tatou Ta’ita’i mo le manuia o Samoa mo nei ma le lumana’i.
O le palota fo’i, o le matāfaioi a so’o se Samoa ua ausia lona 19 tausaga ma luga atu. Saunoa Tuiafelolo, o le Tulafono lava o le Tulafono, e tāua le tausia ma usitā’ia, e tu’uitiitia ai le seleni alu ma ni fa’asalaga e a’afia ai, ona o le lē manatu mamafa i ai.
TO’A 72 MAI ILE ITUMALO O VAIMAUGA 3 O LE A TU’UINA ATU IAI TUSI ONA E LE’I PALOTA
Mo Vaimauga #3 lava ia, o lo’o fa’amauina e 72 sa le’i palota ae ua lesitala, o le a tu’uina atu ai tusi a le Ofisa o le Komisi o Faigā Palota (O.E.C.) mo le fa’atalanoaina pe aisea na lē palota ai.
E 2,044 sa lesitala mo lea Itumālō Palota ae le’i palota, a’o le 922 o lea aofa’i, ua mae’a fa’amauina mafua’aga o le lē palota ai, e aofia ai latou ua malaga i galuega fa’avaitaimi, o e ua māliliu, o e ua nofomau i atunu’u i fafo ma nisi lava mafua’aga tāua.
Tala Feso’otai | Related Articles : $2,000 talā le sala tupe pe a lē resitala ma lē palota; ae ua ausia le 21 tausaga | Fa’agasolo resitala
Source; Sāvali Newspaper
