Aso Lua 29 Aukuso 2023
O le aso 20 Setema 2023 le aso mulimuli o lo o ua tu’uina mai e le Matagaluega o Pisinisi Alamanuia ma Leipa, i ni kamupanī tuma’oti e 67 le aofa’i, ina ia toe feso’ota’I atu ai ma fa’atalanoa le tulaga o le a o’o iai a latou auaunaga pe afai ae le feso’ota’I atu, se’I vagana ai foi ua fa’amaliena le Matagaluega ise tusi atu mai ile kamupani e fa’ailoa ai o lo o fa’aauau pea ni ana auaunaga na mafua ai ona resitala.
Fa’ailoa mai e le Matagaluega, o kamupanī o lo o ta’ua e ala i sa latou Fa’asilasilaga fa’apitoa ile lomiga o le vaiaso talu ai a le Sāvali, o le a ave’eseina mai ile ‘Resitala o Kamupani a Samoa’ e tusa ai ma le Vaega 124 ma le 260(a) o le Tulafono o Kamupani 2001, o kamupani nei e le’I faafouina resitala (failure to file annual return) ma fa’amuta le tauaveina o pisinisi, ma ua leai se isi mafua’aga e toe fa’aauau ai le kamupani.
E ese’ese masina o le tausaga e tau (due) i ai le fa’afouina o resitala tau kamupanī ma e fua lava ile masina na ulua’I resitala ai, lona uiga afai na ulua’I resitala ile masina o Aukuso 2022 e tau (due) le failaina ma fa’afouina o le resitala (annual return filing) ile aso mulimuli o le masina lenei o Aukuso 2023.
O le Fa’asilasilaga lava lea e tasi na tu’uina mai e le Ofisa Sili o Pulega ma le Resitala o Kamupanī fa’atasi ai ma le Resitala o Sosaiete, afioga ia Pulotu Lyndon Chu Ling, le isi fa’aopopoga ma le Fa’asilasilaga fa’alaua’itele o lo o faailoa mai ai i Sosaiete e 26 o lo o i luga o le Fa’asilasilaga, le tuuina mai iai ole 3 masina e tala aa’o atu ai ile Ofisa ma fa’atalanoa le mafua’aga ua latou le tausisia ai nisi o aiaiga I lalo o Tulafono o Sosaiete Tu’ufaatasi 1952 (Incorporated Societies Ordinance 1952).
Ua silia ma le 4 tausaga talu ona mafai foi ona faila online le fa’afouina o resitala mo kamupani i luga o le upega tafailagi Business Registries a le Matagaluega o le MCIL i Samoa.
Source; Sāvali Newspaper
