Aso Toonai 19 Aukuso 2023
O se tasi o ripoti i le aoauli o le Aso Toonai nei a le 1NEWS na fa’ailoa mai e to’atolu nisi na loka e leoleo fa’atasi ai ma le fao fa’amalosi o ta’avale a nisi sa aga’i atu i le fanuatanu o lo o teuina ai le tino maliu o le alii o Charles Anthony Pongi, i Aukilani.
E tusa ai o le ripoti na tuuina mai e le 1NEWS; o le alii o Pongi e 32 tausaga ma na maliu ona o ni manu’aga mai i ni pulufana ona o se misa sa a’afia ai lenei alii ise tasi o aai i Aukilani tutotonu ua ta’ua o Pt England, ma e masalomia o ni fe’ese’esea’iga i le va o se tasi o kegi ma le kegi a le Head Hunters sa iai lenei alii.
E 28 tausaga le matua o se taule’ale’a sa pu’eina ma loka e leoleo ile vaiaso ua mavae atu, ona fa’apea sa lotolotoi ai fo’i ma ia i le misa ma pa’igalima lea sa a’afia ai le alii o Pongi, e ui o lo o nofo va’ava’aia ona e le’i mae’a ona tuli lona fa’asalaga, aemaise ai ua avea lona lotolotoi ai i le misa ma auala ua ia soli ai aiaiga o lona nofo va’ava’aia (electronically monitored bail).
E le’i manino ile ripoti na tu’uina mai le mafua’aga na loka ai le to’atolu o i latou sa aga’i atu ile falelauasiga o le ali’i o Pongi, fa’atasi ai ma le mafua’aga ua fao fa’amalosi ai e leoleo ta’avale a nisi sa auai atu i le fanuatanu mo sauniga fa’ai’u o le taule’ale’a.
Related article : Police highly visible across parts of Tamaki Makaurau this weekend
Source; 1NEWS
