8 Aukuso 2023
I lalo o tulafono (tau faigapalota) e ao ai i se sui faipule ua fa’amavae – a o le’i mae’a le 5 tausaga o se paeaiga – mai i se Vaega Fa’aupufai sa tauva ai, ona fa’aavanoa le nofoa o le itūmālō, ae fo’i e fa’atino faiga palota la’iti.
O le aso 19 Iulai 2023
I le mae’a ai o le soālaupulega a le Fa’amasinoga
ma Faipule e to’atolu sa se’ei mai i nofoa o itumalo o Siumu, Faleata #4 fa’apea le Vaa o Fonoti – ma fa’amavae mai le
H.R.P.P. ae tuto’atasi, ua maua ai le autasiga ma ua ioeina ai e i latou sa avea ma Sui Usufono mai itumalo nei “moliaga i lalo o le Fuaiupu 142 o le Tulafono o Faiga Palota 2019..” ina ia tula’i ese ma fa’a avanoa nofoa ae toe taliu e fesiligia le tōfā ma le moe mai
o latou Itumālō pe ua mālilie atoatoa i la latou
fa’ai’uga ua faia
Ua mae’a fa’alauiloa le fa’asilasilaga fa’alaua’itele a le Fofoga Fetalai o le Fono Aoao Faitulafono a Samoa iā Papāli’i Li’o
Oloipola Taeu Masipa’u mo le avanoa ai o nofoa o ia Itumālō.
Ma ua mae’a fa’atino foi le momoliina e nisi o sui o itumalo e 3 ia i latou ua fa’amavae mai i le HRPP e pei ona tauvā ai i le Faigāpalota Tele ua tuana’i atu i le 2021, ae ua fa’ailoa fa’alaua’itele lo latou finagalo, ina ia toe tauvā i Faigāpalota Lāiti a o latou Itumālō i lalo o le fa’amalu a le Vaega Fa’a’upufai a le Fa’atuatua i le Atua Samoa ua Tasi (F.A.S.T.).
Amata tapenaga a le Ofisa o Faigapalota
E ui fo’i la e le’i fa’ailoa aloa’ia i le taimi nei suafa o i latou o le a tauvā i lalo o le fa’amalu a le Vaega Fa’aupufai e Puipuia Aiā Tatau a Tagata (H.R.P.P) aemaise ai e le’i fa’amautuina mai se aso tonu ua atofaina mo Faiga palota la’iti, ae o lo o ua amata tapenaga a le Ofisa o Faigapalota mo lea fa’amoemoe..
6,034 tagata palota i Siumu, Faleata #4, Va’a o Fonoti – i le Palota Tele 2021
Ae o le lomiga o le vaiaso na te’a nei a le nusipepa o le Savali, o lo o fa’ailoa mai ai e ala I sa latou feso’ota’iga ma le Ofisa o Faiga
Ia lola palota a Itumālō Palota nei e tolu, o lo’o maioio mai ai le numera o tagata palota, lea sa fa’aāogaina i le faigā palota
tele a le atunu’u i le masina o Aperila 2021.
O le Itumālō Palota o Faleata #4 e 2,171 o Siumu e 2,191 ma Va’a o Fonotī e 1,672.
Fa’atalanoaga a le Savali ma le Komesina o Faigapalota; Tuiafelolo John Stanley.
“O le Aso Lulu, 02 Aokuso lea sa tatala ai lola Palota a Itumālō Palota o Faleata #4, Siumu ma Va’a o Fonotī e lesitala ai latou ua agava’a mo le Faigā Palota Lāiti, e tusa ai ma le poloā’iga a le Fofoga Fetalai sa tu’uina mai i le Ofisa nei.
“E lua vaiaso o le a fa’agasolo ai le galuega a le Ofisa o Faigā Palota, mo le lesitalaina o i latou e le’i lesitala aemaise o i latou ua atoa le 21 tausaga ma i latou ua manana’o e sui (transfer) a latou palota.
“Ia manatua, o le tulafono o lo’o i ai, e tatau ona atoa lelei le 10 tausaga ona fa’atoā mafai lea ona sui le Itumālō e te palota ai.
“O le toe tatala o lola palota mo lesitala, o le ā fa’aopoopo pe fa’aitiitia ai fo’i le numera o tagata palota, auā o lea o le ā ‘ave‘ese mai ai tagata ua māliliu fa’apea fo’i le fa’aopoopo o le numera pe a lesitala tagata fou ma tagata ua atoa le 21 tausaga le mātutua.
“E mae’a le galuega lea mo le lua vaiaso, ona toe siaki atoa lea o lola palota, ona fa’atoā fa’ailoa lea o le aso e fa’aulu mai ai suafa o sui tauvā o Itumālō.
“E mata’itū uma vaega nei, ina ia manino mea uma i le nonofo tapua’i mai o Samoa atoa.
Fa’alauiloa a sui tauva
O se avanoa fo’i lea na toe fa’alauiloa ai e le Komesina o Faigā Palota le fa’alauiloa a sui tauva, ina ia tausisia lava ala o le tulafono o lo’o limata’ita’iina ai le fa’atinoga o fa’alauiloa mo le faigā palota, ae le’o le fa’alauiloa e fa’aāogaina ai seleni, po’o taumafa, po’o se isi lava gaioiga e ono soli ai tulafono o faigā palota.
“E lelei lava le tausisi i fa’alauiloa e ono lē a’afia ai i le tulafono.
“E mafai lava ona e talanoa i tusitala ma le aufa’asalalau mo le fa’alauiloaina o lou agava’a mo le faigā palota la’itiiti a lou Itumālō.”
Source ; Savali Newspaper
