Aso Lua, 26 Setema 2023
Tusia: Marieta Heidi Ilalio
Ua fa’atinoina nei e le Matagaluega o Leoleo ia se latou polokalame fa’apitoa e fa’apito augafa lava lea mo le puipuiina o fanau o lo’o fa’atau savali oloa i le ala aua lava le latou saogalemu.
O lenei polokalame ua fa’aigoaina o le Street Vendors Operation o lo’o feagai tonu lea ma le Vaega o Auaunaga Lautele (General Policing) ma o lo’o mata’ituina ai fanau talavou o lo’o fa’apea ona faatau savali oloa i le ala i taimi o le po, aemaise lava o fa’ai’uga o le vaiaso.
I se pepa o fa’amatalaga e pei ona tu’uina mai e le Matagaluega o Leoleo o lo’o ta’ua ai, o lenei polokalame fa’apitoa o le tali atu lea i atugaluga mo le puipuiga o le saogalemu e le gata o fanau nei a’o le mamalu lautele o le atunu’u.
O lo’o tele le polokalame lenei i le talafatai o Apia e pei ona tu’uina mai i lenei pepa o fa’amatalaga ma o lo’o mata’ituina ai pe o mulimulita’ia e fanau nei ia tulafono ua mae’a fa’ata’atitia e le gata ina ia malu puipuia ai i latou uma aemaise o le mamalu lautele o le atunu’u.
