Aso Gafua 25 Setema 2023
Tusia; Marieta H. Ilalio
I tala mai le fa’amasinoga ua tu’uina atu nei se fa’asalaga fa’afalepuipui i se tama’ita’i lea na ia ioeina lona ave fa’agaoi o seleni mai le faletupe o le Western Union atoa ai foi ma le Fale Meli (Samoa Post).
O ia lea o Faititili Taifau Otineru e 23 tausaga, lea ua tu’uina atu ai e le fa’amasinoga le tolu masina e falepuipui ai mai le moliaga sa ia ioeina o le gaoi a’o avea ma tagata faigaluega.
E tusa ai o faamaumauga a leoleo o lo’o ta’ua ai e $3,915 le aofa’iga o le tinoitupe a le Western Union na aveesea faagaoi e lenei tama’ita’i ae $5,873 le tupe a le falemeli lea na ia to’esea faasolitulafono ma o le aofa’iga atoa o le tupe na ia aveina e $9,788.
I le amataga o le fa’asalaga a le fa’amasinoga mo le tama’ita’i lenei e lua tausaga, peita’i onao lona ioeina o nei moliaga na to’esea mai ai le 21 masina atoa ai ma le tu’u avanoa o le fa’amasinoga ia te ia ona o le laititi o lona soifua a’o lenei ua a’afia i soligatulafono.
O le tolu masina lenei ua tu’uina atu ia te ia e le fa’amasinoga ina ia toe matimati ai lona olaga ma faia se suiga fou ina ia aua ne’i toe molia atu i se soligatulafono i le lumana’i.
I luma o le fa’amasinoga i vaiaso ta’itasi, ua le asa ma tagata e molia atu pea i lenei soligatulafono o le gaoi a’o avea ma tagata faigaluega ma e matele lava i le itupa o Tina ma Tama’ita’i.
