Aso To’onai 19 Aukuso 2023
O le tausaga ua mavae atu na lipotia mai ai le umi o se taimi o tālia le tatalaina o se pamu penisini fou i Tuana’imato, fa’afesaga’i ma le nofoaga o lo o iai le isi ofisa o le Pulega o Tineimū (FESA) a’o fa’agasolo ona fefālōa’i le fa’atalanoaina o le mataupu e fa’ipisinisi na ulua’i fausia le pamu ma ē ona le fanua o lo o tu ai lenei atina’e.
Ae i le vaiaso nei i se tasi o lomiga a le nusipepa o le Savali, o lo o fa’ailoa mai ai o lo o ua ‘Mautū le Pamu Penisini fou a le Mālō i Tuana’imato’.
I le lipoti lea a le Savali , o lo o tā’ua ai e “$3 miliona le tau sa fa’atauina ai e le Matāgaluega o Tupe’ lea atina’e auā ana fuafuaga tāua e pei ona ta’imua ai le Matāgaluega o Tupe auā ana taligāmālō mo Fonotaga a Mālō o le Taupulega i le 2024.’
O le atoaga fo’i la o le ripoti lea a le Savali o lo o fa’ailoa mai ai e tasi ‘eka le telē o le fanua o lo’o i Tuana’imato fa’afesaga’i ma le nofoaga o lo’o i ai le isi lālā o le Ofisa o Tineimū ma Fa’alavelave Tutupu Fa’afuase’i (S.F.E.S.A.) ua faia ai lea atina’e.
O le atina’e muamua ua fausia e aofia ai le pamu penisini fou, o le ofisa, o le nofoaga autū e paka tasi ai ta’avale a le Mālō (Base Transport Sector) mo lea fonotaga tele o le ā usuia mai i Samoa.
O lo’o i ai fo’i ma le fale, o lo’o fuafua e le Matāgaluega o Tupe mo le la’u atu i ai o faila ma vaega uma sa teu i le nofoaga i Vaimea.
I le folasaga a le sui mai le Matāgaluega o Tupe iā Heremoni Suapaia Ah Hoy, sa folasia ai le sini autū o le toe fausia o se pamu fou mo le Mālō, ina ia fa’aauau pea ona fa’aāoga e utu ai ta’avale a le Mālō, e pei ona i ai muamua.
“E āoga le pamu lenei i taimi o fa’alavelave fa’alenatura, ina ia vave ona tatou tali atu i fa’alavelave fa’afuase’i.
“O se taumafaiga ina ia tasi le nofoaga le utu uma ai ta’avale a le tatou Mālō.
“O se aso ona tatala lea o lea pamu fou a le Mālō, ua n’o ta’avale a Matāgaluega a le Mālō o le a mafai ona utuina ai.
“O lo’o i ai le fuafuaga a le Matāgaluega o Tupe, i le lumana’i, o le ā utu uma loa i lea pamu ta’avale a Fa’alapotopotoga Tumā’oti a le Mālō.”
E taunu’u atu le asiasiga a le Komiti a le Kapeneta mo Atina’e (C.D.C.) o lo’o fa’agasolo lava galuega toe fa’aleleia mo lea pamu penisini e aofia ai le toe valiina atoa ma le fausia o le pa e si’omia ai lea aseta tāua a le Mālō.
E le’o toe mamao ae tatala aloā’ia lea pamu penisini fou a le Mālō mo lona fa’aāogaina.
Source; Savali Newspaper
