Tusia e : Marieta Ilalio 03.11.2021
O le aoauli nei foi lea na tu’u e fofogaina ai se fa’ai’uga a le Fa’amasinoga Maualuga mo le alii o Tagaloasa Maugaloto ma lona to’alua ia Taofi Mose.
O i la’ua nei ua o la ioeina e tauala atu i le la loia ia Ann Matalasi ia moliaga e lima o le umiaina o fuala’au fa’asaina o le ‘aisa fa’apea le mariuana.
O i la’ua nei lea na maua fa’atasi mai ma nisi o tagata i se osofa’iga a leoleo lea na fa’atautaia i le afio’aga o Lalovaea i le masina o Iulai o le tausaga lenei.
O le isi to’alima o tagata lea na maua i nei osofa’iga e le gata o Lalovaea ae o Vaitele lea o lo’o ua tu’uina atu le latou fa’amasinoga mo le masina o Fepuari o le tausaga fou ona o lo’o latou te’ena uma moliaga ua faia e le itu a leoleo fa’asaga ia i latou.
Ae mo Tagaloasa ma Taofi, ua o la ioeina le maua ia i la’ua o ni fuala’au fa’asaina o le ‘aisa e 0.3 kalama le mamafa fa’apea ma ni mariuana.
Ua toe tolopo e le afioga i le alii Fa’amasino ia Fepuleai Ameperosa Roma ia le lauina o fa’asalaga o i la’ua nei ona o lea ua fa’ato’a ia tauaaoina le fa’afinauga tusitusia a le tama’ita’i loia a le itu a leoleo fa’apea ma le talosaga a le tama’ita’i loia o lo’o tula’i mo i la’ua nei ia Ann Matalasi.
Saunoa Fepuleai e le mafai ona faia se i’uga a le fa’amasinoga ona o lea fa’ato’a ia tauaaoina ia fa’amatalaga tusitusia nei ma o le a toe tolopo ai mo le aso 10 o le masina lenei le lauina o se fa’asalaga mo i la’ua o lo’o molia.
O Tagaloasa o lo’o te’ena pea e le itu a leoleo le tatalaina i tua ona o nisi foi o mata’upu lea o lo’o tu’ua’ia ai ma fa’atalia ai iloiloga a le fa’amasinoga mo ia i lona taumafai e fa’ao’o le oti i se isi tagata.
