Aso Lulu 10|11|2021
Tusia e : Marieta Ilalio
O le Aso Tofi o le vaiaso na tea nei lea na fa’atautaia ai se fa’amasinoga e fa’asaga i le sa avea ma Pule o le Ofisa o Femalaga’iga a Amerika Samoa ia Peseta Dennis Fuimaono ma sa vala’auina ai molimau mo itu uma e lua.
O lo’o molia Peseta i lona taumafai e fa’amalosi ona tipoti mai i Samoa nei o se ulugalii i le tausaga e 2016 e ui e le’i uia auala sa’o e mafai ai ona tipoti mai lenei ulugalii.
I lipoti mai le Talanei i Amerika Samoa o lo’o fa’aalia ai, o le aso ananafi lea na molimau ai nisi o le aufaigaluega a le Ofisa o Femalaga’iga a Amerika Samoa e tusa o le mata’upu lea e pei ona tula’i mai i le aso 1 o Tesema o le tausaga e 2016 ina ua piki e nisi o aufaigaluega e to’alua a le Immigration a Tutuila ia le ulugalii lenei ia Simeleke Tainafi ma Maori Sipai ma momoli aga’i i le uafu i le mea o lo’o iai le Lady Naomi i lea aso.
E tusa ai o le mata’upu e pei ona finauina e le itu a leoleo o lo’o tu’ua’ia ai o gaioiga nei e pei ona tau tipoti fa’atopetope mai ai lenei ulugalii ina ia le mafai ai ona molimau le fafine lenei e tusa o uiga mataga o lo’o tu’ua’ia na faia iai e Fiu Johnny Saelua, o se tasi o Sui Sinia o le Ofisa o le Kovana i lena vaitau.
I tolaulauga a le fa’amasinoga o lo’o fa’aalia ai o le fafine sa nofo i le aiga o Saelua.
I molimau a nisi o aufaigaluega a le Ofisa o Femalaga’iga na o latou fa’amaonia ai na auina atu lenei ulugalii i lea aso e fa’apea e fia aumai pe tipoti mai i Samoa nei, peitai e le’i mafai ona sa maua e le’o mafai ona uia auala sa’o e mafai ai ona tipoti mai se tagata i Samoa nei.
O le aso Faraile o le vaiaso na te’a nei lea sa fuafua e fofogaina ai molimau fa’ai’u a le itu a Leoleo e tusa o tu’ua’iga e pei ona faia fa’asaga i le sa avea ma Pule o le Ofisa o Femalaga’iga a le teritori o Amerika Samoa ia Peseta.
