24 Tesema 2023
Ua tūtoa, tūtonu, tumālō la tatou fesilafa’iga I lenei taeao na liugalua.
Ua matagofie fo’i le felanulanua’I o lo tatou po, I foliga ma a outou teuga matagofie. Ia aemaise foi o le teuteuina e tinā o lo tatou maota nei, ina ia matagofie atili. lo tatou po fiafia.
Ae o ī tonu, e moni ai le upu, ‘Ua matagofie e pei o le fale nai Amoa. E lau i ula ae pou i toa, fola lelei ae faufau i a’a o le ōa.
Ma e le toe vāea ai le fala o’oto, auā pa’ia o sasao nei. O pa’ia lava ua tofu ma pa e lē sōloia. Le pa’ia i Āiga ma a latou tama, tulatoa a aiga ma faleupolu ua tofia. Ia aemaise le usoga a Tumua ma Puleono i Salāfai. Fa’apea le fa’anoanoaga manū i auauna o le Talalelei.
Fa’atalofa fo’i ile fa’afofoga mai ile afiafi lenei a ō tatou sui, ia o pa’ia auā le faigamālō a Tutuila ma le motusā (motu i sasa’e). O pa’ia lava e fa’asino ile falelima i sasa’e ma le falelima i sisifo, le nofoāma’opū, fa’atui motuto’a ma le motu tele.
O pa’ia ia o Samoa lea ua titi taunoa i Petesa nei, o le laumua o le HRPP o tua o le malae i Ti’afau e sa’ilimālō ai le Vaega Fa’aupufai lenei, auā le malu puipuia o aiā tatau, a i tatou uma o Samoa.
Tatou te ave ai le fa’amua ile Atua i Lona fa’aogāina oi tatou o tagata vaivai e tautua ai Samoa ma aumai le lagolago ile moni o auaunaga a o tatou sui i totonu o le Palemene o Samoa, e fa’atino ai le manulautī, ma o le fu’a fa’alelea lea e fa’ailoa ai le agaga maualuga o le lē faimea fa’apito, ma fa’ailoa upu ta’utino; ‘O le mea e lelei mo Apia e lelei fo’i mo so o se tulimanu o Samoa’.
Ma ia taulāmua fo’i sui ā faipule filifilia e itumalo, latou te olaina i galuega fai, ia ma ‘aua foi le pala’aai e finau. E le gata e finau i totonu o le Maota o le Fonousu a Samoa, ia ae fa’apea foi fafo mai ole Palemene o Samoa.
Lea ua outou fa’afofoga ile saunoaga a le Ta’ita’I o le Sauniga, (fa’amālō le tapena). Toe fa’amanatu mai ai ole 44 lenei o tausaga talu ona fa’atuina le HRPP. O le Vaega ua matua lona soifua ma ua mautū fo’i lona nofoaga tutotonu i Petesa nei talu ona fa’atuina ile tausaga e 1979.
Ua 11 faigapalota lautele ua tauvā ai ma ua fa’asefulu (10) ona manumalo soso’o. E aofia ai ma le faipalota talu ai ile 2021, ae na tatou toe malolo, ona o aga fa’a-fa’amasinoga na fai.
A outou silasila i pa o le Maota nei, o lena o lo o outou silasila atu ai i nofoa’iga e tele, lea o loo faailoa mai i suafa o i latou, sa tauaveina le Vaega lenei mai lava i lona amataga, sei tau mai i le lisi o lo o ile itu tauagavale, e sau lava mai lugā e tau i lalō. Ae o lea e le’I tuuina i luga le lisi, o la tatou Vaega na toe meme’i atu lava i lalo ina ua toe malolo ona o fa’amasinoga na fai.
E tele le mau lesona na tatou maua mai ai ile anoano o le mau metotia e tatau ona tatou tapenapena iai. Ae ole 90 pasene (90%) o le galuega e tatau ona fai, e talitonu le taofi e paū tonu lava i sui fa’atutū o le HRPP ma tatou uma o e lagolagoina la tatou Vaega Fa’aupufai.
Auā afai na tatou manumalo ile 10 faigapalota lautele soso’o talu ai, o lona uiga o lea lava e talafeagai le taumafaiga na tatou faia. Ae e iai pea nai vaega ititi e tatau ona toe silasila toto’a iai, ia i tatou uma ina ia tāpena iai, auā le isi sa’iligāmālō o le a soso’o ai.
O le HRPP e sa’ilimalo, e tapena I taimi uma. O lona uiga e leai se taimi e tatau ona mālōlō ai. Ua saosaoa le soifuaga ua iai o tatou tagata ile taimi lenei. Ua matuā le toe aogā iai ia se uiga, e na o le ti’eti’e pasi ma fa’aluelue ai ile tofi.
Fai mai le isi toea’ina o le HRPP, “se o le tausa’afia lava le mea e mo’omia”.
O le a le uiga o le upu ‘tausa’afia’? O le misitelio lilo lena, e pule ai le sui fa’aolioli. Ae afe ma afe auala eseese e fa’atino ai, ia le ‘tausa’afia’. Ae iai foi lona, ‘ole fili lava o le maua’.
Aua foi ne’i galo ia i tatou le fa’amanatu ia te oe (le Perofeta o) Ieremia. O lo o toe famanatu mai ai ia i tatou, ia afioga mai ile Alii. “Na ou iloa oe Ieremia, ae le’i taitai ona faia oe. Na ou tofia oe e avea ma A’u perofeta, ae o lo o e ile manava o lou tinā’.
E iai uiga loloto o lo o aumai iina. Ae iai foi isi, ua pule ai le Ti’apolo i o latou mafaufau. Ma e anoano le mau tala, o lo o aumai ai le limata’ita’iina o isi, e le Ti’apolo.
I le toe vaiaso ona faasatauro ai lea o lo tatou Alii, sa asiasi ma tala’i i totonu o le malumalu ma le pa e siomia ai, ae momo’e mai le isi tagata ma fa’apea mai; “Le Alii e, ua mo’omia lau fesoasoani. O lo o iai se tinā ua ulufia e le Ti’apolo, ma e mata’utia foi uiga o lo o tutupu mai ai”.
Ona afio atu lea o le Alii ma pulato’a iai ile tinā lea, ona va’aia ai lea e tagata le malamalama o fofoga o lo tatou Alii. Ae vala’au mai le Ti’apolo I totonu o le tinā, ‘Lau afioga Iesu o oe o le Alo o le Atua. Paga lou fa’atigainaina o i matou nei. To’aitiiti lava matou lea e nofonofo iī. E le aogā foi ona e toe auina i matou i Seoli, matou te mu ai. Ae se’i e silasila ane ile alii lena e tu i ou tafatafa, o lena ua ia te ia Satani ma agaga leaga uma oi Seoli”.
O le fe’au o lo o aumai iī, e fai o lo tatou mālō, ae tatou te tatalo foi mo le ta’ita’iga a lo tatou Matai, ina ia aumai Lana fesoasoani. Ma o lē lava e fesili, e pei a ona mālie ai ia nisi o Fa’ata’oto a lo tatou Ali’i, o lē tu’itu’i, ona tatalaina m ai ai lea o le faitotoa. Ma o lē foi e fesili, ia ona ave atu ai lea iai ole tali.
O le mea lea e tāua ai ia i tatou uma ua filifilia e avea ma Ta’ita’i o le HRPP, ia tatou fai la tatou galuega. Ma ia tatou manatua i taimi uma, ia lē ia i tatou le viiga. Ae o le vi’iga e ave pea i lo tatou Matai Sili, ona o Lona fa’aoga o tatou tagata e auauna i lo tatou atunuu.
O le tatou fiafia foi lenei, e le gata o le samiina o le 44 o tausaga o lo tatou aso fanau, e sami lava i so o se taimi, mai ia Ianuari e tau ia Tesema.
Ae o la tatou fiafia foi lenei e tatou te fa’atalofa atu ai ile Kerisimasi ma le Tausaga Fou, Ia, auā le tapenaga o lo o tāpena iai le lalolagi Kerisiano e fa’amanatu le aso soifua o lo tatou Ali’i Fa’aola.
O la matou toe upu, ia tatou tau fai maua se Kerisimasi fiafia ma se Tausaga Fou manuia. Ae tatou alo loa i la tatou fiafia.
Soifua ma ia manuia.
Tuila’epa Sailele Malielegaoi
Ta’ita’i o le Vaega Fa’aupufai e Puipuia Aia Tatau a Tagata | HRPP
