8 Aukuso 2023
O lo o fa’ailoa mai i luga o le itulau Facebook a le Ofisa o le Komesina o Faigapalota i Samoa, le fa’agasolo ai lea o a latou galuega ma tapenaga a’o lumana’i ai Faiga Palota La’iti mo itumalo o Siumu, Faleata #4 ma le Va’a o Fonoti.
Na amata fa’atino le resitalaina o suafa o i latou e agava’a ina ia palota i totonu o itumalo e 3, ile vaiaso na te’a nei ma o lo o fa’aauau pea. E le’i ma’oti mai pe o le a tonu le aso o le a fa’amae’a ai resitala ae mo le vaiaso nei, o le a maua le avanoa mulimuli e fa’atino ai lea tulaga i le Aso Faraile nei 10 Aukuso 2023, i le Maota o le Ekalesia Metotisi i Puipa’a mo le itumalo o Faleata #4, Maota o le EFKS i Taelefaga mo le itumalo a le Va’a o Fonoti fa’apea ma le Maota o le Ekalesia Metotisi, Maninoa Siumu mo le itumalo fa’apalota i Siumu.
O faamaumauga nei e manaomia e le Ofisa o Faiga Palota aua le faamaonia o lou tagata ma faia ai loa le resitala
- ID Tamaiti Aoga
- NPF ID
- Laisene Ave Taavale
- Tusi Folau
- Pepa Fanau (E tatau ona tuuina mai faatasi ma se ID e iai sou ata)
Fa’amanatu mai e le Komesina o Faigapalota le sala tupe e $100SAT pe a lē palota ae $2000SAT le sala tupe pe a lē resitala ma lē palota
Ao fa’agasolo ai la ia resitala mo faiga palota la’iti o lo o loma nei, sa tu’uina mai ai fo’i ile vaiaso na te’a nei e le nusipepa o le Savali, sa latou fa’atalanoaga ma le Komesina o Faigapalota, Tuiafelolo John Stanley. O lo o toe fa’amanatu mai ai e le Komesina le lē gata ina fa’atāua le fa’atinoina o le resitala, ae silisili fo’i ona tāua le fa’atinoina o lau palota i le aso o le a atofaina mo lea tulaga. E 2 ituaiga sala tupe i lalo o le tulafono e ono fa’asala ai se tasi e na te fa’atuatuana’i ma lē ano e fa’atino lona sao i faiga filifiliga . O lo o tumau pea ona iai le sala tupe $100SAT pe a lē palota, fa’atasi ai ma le $2000SAT le sala tupe pe a lē resitala ma lē palota ae ua ausia le 21 tausaga e tatau ai ona agava’a e resitala ma palota.
Se’i vaganā i latou e fa’amaonia o lo o malaga ese ma le atunu’u i le aso o faiga palota la’iti
Saunoa Tuiafelolo i le fa’atalanoaga lava lea ma le nusipepa o le Savali, se’i vaganā i latou o lo o iai suafa i le lola palota a itumalo o lo o alo mo faigapalota e maua atu ni fa’amaoniga o lo o malaga ese ma le atunu’u ile aso tonu o faiga filifiliga, ona fa’atoa fa’apafala lea o se fa’asalaga e pei ona ta’ua, fa’atasi ai ma i latou o lo o iai pea suafa i le lola palota ae ua fai i lagi le folauga.
Source; Savali Newspaper
